سیف گیمز 2027 کی تاریخیں مقرر، 28 کھیلوں میں 6 ہزار سے زائد کھلاڑی و آفیشلز شریک ہوں گے

اسلام آباد: نائب وزیراعظم و وزیر خارجہ سینیٹر محمد اسحاق ڈار کی زیرِ صدارت سیف گیمز (SAF Games) 2027 کی تیاریوں سے متعلق اعلیٰ سطح اسٹیئرنگ کمیٹی کے اجلاس میں مقابلوں کی باقاعدہ تاریخیں 4 سے 11 اپریل 2027 مقرر کر دی گئی ہیں۔

جنوبی ایشیائی اولمپک کمیٹی کے تعاون سے طے پانے والی تاریخوں کے مطابق، ان علاقائی کھیلوں میں 28 مختلف کھیل شامل ہوں گے جن میں جنوبی ایشیا کے ملکوں سے 6 ہزار سے زائد کھلاڑیوں اور سپورٹ آفیشلز کی شرکت متوقع ہے۔ اجلاس میں سیف گیمز کے لیے نیشنل کوآرڈی نیٹر کی تقرری کے ساتھ ساتھ اسٹیئرنگ، آرگنائزنگ اور صوبائی کمیٹیوں کی باضابطہ تشکیل کی بھی منظوری دی گئی۔ یہ مقابلے وفاقی دارالحکومت اسلام آباد، پنجاب اور خیبر پختونخوا میں مشترکہ طور پر منعقد کیے جائیں گے۔

نائب وزیراعظم اسحاق ڈار نے تمام متعلقہ اداروں کو ہدایت کی کہ کھیلوں کی سائٹس اور انفراسٹرکچر کی تیاری مقررہ وقت پر اعلیٰ ترین بین الاقوامی معیار کے مطابق مکمل کی جائے۔ انہوں نے پیش رفت کا جائزہ لینے کے لیے اسٹیئرنگ کمیٹی کو ہر ماہ باقاعدگی سے اجلاس منعقد کرنے کی ہدایت کی تاکہ تیاریوں کو وقت پر حتمی شکل دی جا سکے۔ اجلاس میں وزیراعظم کے معاونِ خصوصی طارق باجوہ سمیت وفاقی اور صوبائی حکومتوں کے اعلیٰ حکام نے شرکت کی۔