بھارت میں طوفانی بارشیں، دہلی ایئرپورٹ میں پانی داخل، ریڈ الرٹ جاری

نئی دہلی: بھارت کے دارالحکومت دہلی اور ملحقہ علاقوں میں جاری طوفانی اور موسلادھار بارشوں کے باعث نئی دہلی کا اندرا گاندھی انٹرنیشنل ایئرپورٹ زیرِ آب آ گیا ہے، جس سے مسافروں کو شدید مشکلات اور سفری تعطل کا سامنا ہے۔

بھارتی میڈیا رپورٹس کے مطابق بارش کا پانی ایئرپورٹ کے ٹرمینل اور لابی میں داخل ہو گیا، جہاں مسافر گھٹنوں تک جمع پانی میں اپنے سامان کے بیگز گھسیٹتے دکھائی دیے جبکہ ایئرپورٹ انتظامیہ صورتحال پر قابو پانے میں ناکام رہی۔ خراب موسم کے باعث متعدد پروازیں متاثر ہونے کا خدشہ ہے، جس کے پیشِ نظر ایئرلائنز نے مسافروں کے لیے خصوصی سفری ایڈوائزری جاری کر دی ہے۔

بھارتی محکمہ موسمیات (IMD) نے صورتحال کی سنگینی کو دیکھتے ہوئے دہلی کے لیے ریڈ الرٹ جبکہ اتر پردیش کے علاقوں نوئیڈا اور غازی آباد کے لیے اورنج الرٹ جاری کر دیا ہے۔ شہر کی مرکزی شاہراہوں پر کئی کئی فٹ پانی جمع ہونے سے ٹریفک کا نظام درہم برہم ہو گیا ہے اور گاڑیوں کی لمبی قطاریں لگی ہوئی ہیں۔