نیتن یاہو کا ایرانی حکومت گرانے کیلئے کام جاری رکھنے کا اعلان

اسرائیلی وزیراعظم بنیامین نیتن یاہو نے ایک ٹی وی انٹرویو کے دوران دعویٰ کیا ہے کہ اسرائیل ایران کی موجودہ حکومت اور نظام کو ختم کرنے کے لیے باقاعدہ کام کر رہا ہے۔ انہوں نے کہا کہ ان کی واضح ہدایت پر تمام متعلقہ اسرائیلی ادارے اور سیکیورٹی فورسز ایرانی حکومت کو شکست دینے کے لیے مکمل طور پر سرگرم عمل ہیں۔ نیتن یاہو نے مزید کہا کہ اسرائیلی فضائیہ کے پائلٹس اور طیارے کسی بھی وقت ایران کے اندر کارروائی کے لیے پہنچ سکتے ہیں۔

غزہ کی موجودہ صورتحال پر بات کرتے ہوئے اسرائیلی وزیراعظم نے دعویٰ کیا کہ اس وقت اسرائیلی افواج غزہ کے 60 فیصد سے زائد علاقے پر مکمل کنٹرول حاصل کر چکی ہیں۔ انہوں نے اعادہ کیا کہ اسرائیل کا بنیادی مقصد حماس کو مکمل طور پر غیر مسلح کرنا، غزہ کو غیر عسکری بنانا اور اس بات کو یقینی بنانا ہے کہ یہ خطہ مستقبل میں اسرائیل کے لیے کسی قسم کا دفاعی خطرہ نہ بن سکے۔