وزیراعظم کا نرس رضیہ نورین کو ایک کروڑ روپے کا چیک، بہادری پر خراج تحسین

وزیراعظم شہباز شریف نے آتشزدگی کے حادثے کے دوران اپنی جان پر کھیل کر نومولود بچے کو بچانے والی شجاع نرس رضیہ نورین سے ملاقات کی اور ان کی بے مثال بہادری اور ہمت کو سراہتے ہوئے انہیں 1 کروڑ روپے کا امدادی چیک پیش کیا۔ اس موقع پر وزیراعظم نے ان کے سر پر ہاتھ رکھ کر تھپکی دی اور اعلان کیا کہ رضیہ نورین کی اس جرات مندانہ خدمت کے اعتراف میں انہیں آنے والے 23 مارچ کو سول اعزاز تمغۂ خدمت سے نوازا جائے گا۔

ملاقات کے دوران وزیراعظم نے کہا کہ قوم کی بیٹی رضیہ نورین کا یہ کارنامہ تاريخ میں سنہری حروف سے لکھا جائے گا اور پوری قوم کو ان کی شجاعت پر فخر ہے۔ دوسری جانب نرس رضیہ نورین نے واقعے کی تفصیلات بتاتے ہوئے کہا کہ شدید آگ اور دھوئیں کے باوجود انہوں نے اپنی پروا کیے بغیر بچوں کی زندگی بچانے کا فیصلہ کیا اور نومولود کو بحفاظت باہر نکال لائیں۔ انہوں نے مزید بتایا کہ جب وہ دیگر بچوں کی مدد کے لیے دوبارہ اندر گئیں تو دھماکا ہو گیا تھا، تاہم وہ خوش ہیں کہ انہوں نے اپنا انسانی اور پیشہ ورانہ فرض احسن طریقے سے نبھایا۔