روس کبھی یورپ کے پیچھے پابندیاں اٹھوانے کیلئے نہیں بھاگے گا: سرگئی لاوروف

ولادی ووستوک میں جاری 11ویں ایسٹرن اکنامک فورم کے موقع پر Znanie سوسائٹی کے زیرِ اہتمام ایک لیکچر سے خطاب کرتے ہوئے روسی وزیر خارجہ سرگئی لاوروف نے واضح کیا ہے کہ روس کبھی یورپ کے پاس جا کر پابندیاں ختم کرنے کی درخواست نہیں کرے گا اور نہ ہی ماسکو کو کسی کی خیرسگالی کی ضرورت ہے۔ سرگئی لاوروف کا کہنا تھا کہ روس نے کبھی یورپ کے ساتھ دیواریں کھڑی نہیں کیں اور نہ خود کو اس سے الگ کیا، بلکہ یہ فیصلہ یورپی یونین کا اپنا تھا۔ انہوں نے یورپی سوچ کو غلط فہمی قرار دیتے ہوئے کہا کہ یورپ نے یہ سمجھ لیا تھا کہ معاشی تعاون روس کی مجبوری ہے اور وہ معافی مانگ کر پرانے تعلقات کی بحالی کی التجا کرے گا، لیکن ایسا ہرگز نہیں ہوگا۔

روسی وزیر خارجہ نے روس کی قومی خودداری اور خود مختاری پر زور دیتے ہوئے کہا کہ ماسکو کے پاس دنیا میں ایسے متعدد سچے دوست اور شراکت دار موجود ہیں جو مساوی، باہمی احترام اور نیک نیتی کی بنیاد پر تعاون کے لیے تیار ہیں۔ موجودہ یورپی قیادت پر تنقید کرتے ہوئے انہوں نے کہا کہ اس وقت یورپی حکام میں روس کے ساتھ برابری کی سطح پر بات چیت کرنے کی نہ تو نیت ہے اور نہ ہی صلاحیت۔ اس لیے روس اپنی خارجہ اور اقتصادی پالیسی ان ممالک کے ساتھ آگے بڑھائے گا جو باہمی فائدے اور احترام پر یقین رکھتے ہیں۔ یہ گفتگو روسکی جزیرے پر واقع فار ایسٹرن فیڈرل یونیورسٹی میں جاری چار روزہ ایسٹرن اکنامک فورم کے حاشیے پر کی گئی۔