ایران نے شادی کی تقریب پر حملے کو واشنگٹن کی اخلاقی گراوٹ کی ایک اور مثال قرار دیدیا

ایران کی وزارتِ خارجہ کے ترجمان اسماعیل بقائی نے صوبہ ہرمزگان کے شہر کوہستک (سیرک) میں ایک رہائشی عمارت میں جاری شادی کی تقریب پر امریکی حملے کو واشنگٹن کی اخلاقی گراوٹ کی واضح مثال قرار دیا ہے۔ ترجمان نے اپنے بیان میں کہا کہ اس حملے نے ایران کے خلاف امریکی غیر قانونی جنگی اقدامات کی اصل حقیقت دنیا کے سامنے عیاں کر دی ہے۔ ایرانی حکام کے مطابق اس بمباری کے نتیجے میں 5 افراد شہید اور 65 زخمی ہوئے۔ اسماعیل بقائی نے امریکی اقدامات کے دفاع کے لیے مصنوعی ذہانت (AI) سے تیار کردہ ویڈیوز کے استعمال کی بھی شدید مذمت کی اور کہا کہ اصل حقیقت امریکی فورسز کے ہاتھوں ہونے والا جانی نقصان اور جنگی جرائم ہیں۔