ایران اسرائیل کیساتھ دوبارہ جنگ سے پہلے امریکی اڈوں کو نشانہ بنا رہا: عالمی تجزیہ کار

آسٹریا کے معروف عسکری تجزیہ کار ٹام کوپر نے انکشاف کیا ہے کہ ایران کی پاسدارانِ انقلاب کی جانب سے خطے میں امریکی اڈوں، فوجی اثاثوں اور اتحادیوں کو نشانہ بنانے کی بنیادی حکمتِ عملی کا مقصد اسرائیل کے ساتھ کسی بھی نئی جنگ سے پہلے امریکہ کو خطے سے باہر نکالنا ہے۔ اسرائیلی اخبار سے گفتگو کرتے ہوئے انہوں نے بتایا کہ ایران آبنائے ہرمز اور دیگر علاقوں میں امریکی اہداف کو نشانہ بنا کر واشنگٹن کو اپنے مہنگے کروز اور دفاعی میزائلوں کا ذخیرہ ختم کرنے پر مجبور کر رہا ہے، جس سے امریکی افواج کی بڑے حملوں کی صلاحیت متاثر ہو رہی ہے۔ عسکری تجزیہ کار کے مطابق یہ صورتحال امریکہ اور اسرائیل کے لیے انتہائی سبکی کا باعث بن رہی ہے کیونکہ شدید بمباری کے باوجود وہ ایران کی جوابی کارروائی اور مزاحمت کی صلاحیت کو ختم کرنے میں ناکام رہے ہیں۔