جغرافیائی، سیاسی کشیدگی: 86 ٹن سونا امریکا اور کینیڈا سے برطانیہ منتقل

نیدرلینڈز کے مرکزی بینک نے بڑھتی ہوئی جغرافیائی و سیاسی کشیدگی کے پیشِ نظر اپنے ذخائر میں سے 86 ٹن سونا امریکہ اور کینیڈا سے نکال کر برطانیہ منتقل کرنے کا اعلان کیا ہے۔ ڈچ سینٹرل بینک کا کہنا ہے کہ نیویارک اور اوٹاوا کے مقابلے میں لندن میں موجود سونے کے ذخائر کی تجارت زیادہ آسانی سے ممکن ہے۔ اس منتقلی کے بعد امریکہ اور کینیڈا میں نیدرلینڈز کے سونے کا تناسب کم ہو کر 18.5، 18.5 فیصد رہ گیا ہے جبکہ لندن میں اس کا حصہ بڑھ کر 32.1 فیصد ہو گیا ہے؛ باقی 30.8 فیصد سونا نیدرلینڈز میں ہی محفوظ ہے۔ بینک حکام کے مطابق 72.2 ارب یورو مالیت کے 612.4 ٹن کل ذخائر کی یہ منتقلی جزوی طور پر خرید و فروخت کے ذریعے عمل میں لائی گئی ہے۔