ایران جنگ میں شدت: عالمی معیشت کیلئے ایک اور بڑا خطرہ پیدا، مہنگائی کے خدشات بڑھنے لگے

ایران جنگ میں شدت کے باعث عالمی معیشت پر شدید منفی اثرات کے خدشات بڑھ گئے ہیں، جبکہ ایندھن اور تیل کی قیمتوں میں اضافے سے امریکہ سمیت دنیا بھر میں مہنگائی کی نئی لہر کا خطرہ پیدا ہو گیا ہے۔ 40 کھرب ڈالر کے بھاری قرضوں کے بوجھ تلے دبی امریکی حکومت کو اس وقت مزید معاشی چیلنجز کا سامنا ہے جہاں 10 سالہ امریکی ٹریژری بانڈز کی شرحِ منافع تین سال کی بلند ترین سطح پر پہنچ چکی ہے۔ معاشی ماہرین اور تجزیہ کاروں کے مطابق جرمنی، برطانیہ اور جاپان کے سرکاری بانڈز کی شرحِ منافع میں بھی نمایاں اضافہ دیکھا جا رہا ہے، جس سے حکومتوں، کاروباری اداروں اور صارفین کے لیے قرضے مہنگے ہو جائیں گے۔ ماہرین نے خبردار کیا ہے کہ اگر یہ جنگ طویل ہوئی تو مسلسل مہنگائی، بلند شرحِ سود اور کمزور معاشی نمو عالمی معیشت کو شدید بحران میں دھکیل سکتی ہے۔