ولادی ووستوک میں 11واں ایسٹرن اکنامک فورم شروع، 80 ممالک کے نمائندوں کی شرکت

ولادی ووستوک: روس کے مشرقِ بعید (Far East) کے ساحلی شہر ولادی ووستوک میں 11ویں چار روزہ ایسٹرن اکنامک فورم (EEF) کا باضابطہ آغاز ہو گیا ہے، جو 4 ستمبر تک فار ایسٹرن فیڈرل یونیورسٹی کے کیمپس میں جاری رہے گا۔

روسکونگریس فاؤنڈیشن کے مطابق رواں سال فورم کا مرکزی موضوع “دورِ مشرق  عوام کی فلاح کے لیے ترقی” رکھا گیا ہے، جس میں 80 سے زائد ممالک کے 5 ہزار سے زائد ماہرین، کاروباری شخصیات اور بین الاقوامی وفود شرکت کر رہے ہیں۔ فورم کا بنیادی مقصد روس کے مشرقِ بعید میں سرمایہ کاری کو فروغ دینا اور ایشیا پیسیفک خطے کے ممالک کے ساتھ لاجسٹکس، توانائی، مصنوعی ذہانت (AI) اور تجارت کے شعبوں میں باہمی تعاون کو وسیع کرنا ہے۔ پہلے روز “سٹریٹ آف دی فار ایسٹ” نمائش کا بھی افتتاح کیا گیا، جہاں 2015 سے اب تک خطے میں 1,118 نئے صنعتی اداروں کے قیام اور 6.8 ٹریلین روبلز کی سرمایہ کاری کا احاطہ کیا گیا۔

روسی صدر ولادیمیر پوتن نے فورم کے شرکاء کو اپنے خصوصی پیغام میں اس ایونٹ کو عالمی کاروباری حلقوں اور حکومتوں کے درمیان کھلے مکالمے کا اہم پلیٹ فارم قرار دیا۔ صدر پوتن، جو شنگھائی تعاون تنظیم (SCO) کے اجلاس کی تمام تر مصروفیت کے بعد ولادی ووستوک پہنچیں گے، فورم کے مرکزی پلینری سیشن سے خطاب کریں گے۔ روسی حکام کے مطابق مشرقِ بعید کی ترقی کے لیے 13.5 ٹریلین روبلز کی مالیت کے 3 ہزار سے زائد منصوبوں پر کام جاری ہے، جو عالمی اقتصادی نظام میں روس کی مشرق کی جانب منتقلی کی حکمتِ عملی کا حصہ ہیں۔