پاکستان کا تیل کا درآمدی بل جولائی میں ساڑھے 3 کھرب روپے تک پہنچ گیا

اسلام آباد: عالمی منڈی میں خام تیل کی قیمتوں میں مسلسل اضافے کے باعث جولائی کے مہینے میں پاکستان کا تیل کا درآمدی بل بڑھ کر 1.28 ارب ڈالر (تقریباً 3 کھرب 57 ارب 5 کروڑ روپے) کی بلند ترین سطح پر پہنچ گیا ہے۔

‘سینٹر فار ریسرچ آن انرجی اینڈ کلین ایئر’ (CREA) کی رپورٹ کے مطابق اس مالیاتی بوجھ کی بنیادی وجہ ایران سے متعلق بڑھتی ہوئی کشیدگی اور آبنائے ہرمز میں پیدا ہونے والی رکاوٹیں ہیں، جنہوں نے عالمی سطح پر انرجی سپلائی چین کو شدید متاثر کیا ہے۔ عالمی سطح پر اضافے کی اس لہر میں یورپی یونین سب سے زیادہ متاثر ہوئی جس پر 78 ارب ڈالر کا اضافی بوجھ پڑا، جبکہ چین 35 ارب ڈالر اور بھارت 22 ارب ڈالر اضافی اخراجات کے ساتھ بالترتیب دوسرے اور تیسرے نمبر پر رہے۔

رپورٹ کے مطابق پڑوسی ملک بھارت کے خام تیل کے درآمدی بل میں بھی 56 فیصد سے زائد کا نمایاں اضافہ ریکارڈ کیا گیا ہے، جو عالمی منڈی میں جاری توانائی بحران کی عکاسی کرتا ہے۔ معاشی ماہرین کا کہنا ہے کہ عالمی منڈی میں تیل کی قیمتوں میں غیر یقینی صورتحال کے باعث پاکستان جیسے درمیانی اور کم آمدنی والے ممالک کے زرمبادلہ کے ذخائر پر دباؤ مزید بڑھ سکتا ہے۔