فلپائنی کسٹمز کی بڑی کارروائی، افغانستان سے سمگل شدہ منشیات کی بھاری کھیپ ضبط

منیلا: افغان طالبان کے زیرِ انتظام افغانستان سے منشیات کی عالمی سمگلنگ کے نیٹ ورک پر ایک بڑا ضرب لگاتے ہوئے فلپائنی حکام نے منیلا انٹرنیشنل کنٹینر پورٹ پر کارروائی کرتے ہوئے کروڑوں ڈالر مالیت کی منشیات برآمد کر لی ہے۔

فلپائن بیورو آف کسٹمز (BOC) اور ڈرگ انفورسمنٹ ایجنسی (PDEA) نے خفیہ اطلاعات کی بنیاد پر مشترکہ آپریشن کرتے ہوئے افغانستان سے آنے والے دو مشتبہ تجارتی کنٹینرز کی تلاشی لی۔ تلاشی کے دوران کنٹینرز سے 43 کلوگرام اعلیٰ معیار کی میتھ ایمفیٹامین (Methamphetamine / آئس) برآمد کی گئی۔ فلپائنی کسٹمز حکام کے مطابق برآمد شدہ منشیات کی عالمی مارکیٹ میں مالیت تقریباً 51 لاکھ امریکی ڈالر (تقریباً 1 ارب 40 کروڑ پاکستانی روپے) بنتی ہے، جسے ٹالکم اسٹون (Talcum Stone) سے مشابہت رکھنے والے پیکجز میں نہایت مہارت سے چھپایا گیا تھا۔

فلپائنی کسٹمز کمشنر ایریل نیپوموسینو نے کہا کہ بارڈر کنٹرول اور رسک مینجمنٹ سسٹمز کے مؤثر استعمال سے اس بین الاقوامی سمگلنگ کو ناکام بنایا گیا۔ بین الاقوامی امور کے ماہرین اور دفاعی تجزیہ کاروں کے مطابق یہ واقعہ اس بات کا واضح ثبوت ہے کہ افغان طالبان کی حکومت کے زیرِ اثر افغانستان ایک ‘نارکو اسٹیٹ’ کے طور پر خطے اور دنیا کے لیے منشیات کی سمگلنگ کا گڑھ بن چکا ہے، جس کے اثرات اب دنیا کے دیگر خطوں تک پھیل رہے ہیں۔