پاکستان نے قبل ازوقت قرض کی سب سے بڑی ادائیگی کر دی

پاکستان نے 1200 ارب روپے کا قرض مقررہ مدت سے پہلے ادا کر کے ملکی تاریخ کی سب سے بڑی واحد قبل از وقت قرض ادائیگی کا نیا ریکارڈ قائم کر دیا ہے۔ سماجی رابطے کی ویب سائٹ ‘ایکس’ پر مشیر وزیر خزانہ خرم شہزاد نے بتایا کہ اس پیش رفت کے ساتھ ہی پاکستان کی قبل از وقت قرض ادائیگیوں کا مجموعی حجم تقریباً 5,920 ارب روپے (قرایب 6,000 ارب) تک پہنچ گیا ہے۔ انہوں نے واضح کیا کہ اس نئی ادائیگی نے اگست 2025 میں کی جانے والی 1,133 ارب روپے کی سابقہ ریکارڈ ادائیگی کو بھی پیچھے چھوڑ دیا ہے۔ مشیر خزانہ کے مطابق مالی سال 26-2025 میں 2,900 ارب روپے جبکہ جاری مالی سال 27-2026 میں اب تک 1,200 ارب روپے وقت سے پہلے ادا کیے جا چکے ہیں، جس کا مقصد آئندہ برسوں میں بڑی ادائیگیوں کے دباؤ کو کم کرنا اور ملکی مالی پوزیشن کو مضبوط بنانا ہے۔