پاکستان ڈیجیٹل معیشت کیلئے تیار ہے: بلال بن ثاقب

وزیرِ مملکت اور پاکستان ورچوئل اثاثہ جات ریگولیٹری اتھارٹی (PVARA) کے چیئرمین بلال بن ثاقب نے ہانگ کانگ میں منعقدہ ‘بٹ کوائن ایشیا کانفرنس’ سے خطاب کرتے ہوئے کہا ہے کہ پاکستان مستقبل کی جدید ٹیکنالوجی اور ڈیجیٹل معیشت کو اپنانے کے لیے مکمل طور پر تیار ہے۔ انہوں نے انکشاف کیا کہ پاکستان نے 6 ماہ سے بھی کم عرصے میں ورچوئل اثاثہ جات کا جامع ریگولیٹری نظام قائم کر لیا ہے، جس کی فعال تشکیل پر منظور شدہ بجٹ کا صرف 8 فیصد (تقریباً 2 لاکھ ڈالرز) خرچ ہوا جبکہ باقی 92 فیصد بجٹ بچا لیا گیا۔ بلال بن ثاقب نے واضح کیا کہ پاکستان کی بنیادی کوشش صرف بٹ کوائن کی بڑی مقدار میں خریداری نہیں بلکہ ملک کو مستقبل کے جدید مالیاتی نظام کے لیے ہم آہنگ بنانا ہے۔