ایران نے امریکی پابندیوں کو ریاستی دہشتگردی قرار دے دیا

ایران نے امریکی معاشی اقدامات کو ریاستی دہشت گردی، غیر قانونی اور قابلِ مذمت قرار دیتے ہوئے شدید الفاظ میں مذمت کی ہے۔ ایرانی وزارتِ خارجہ کی جانب سے جاری کردہ بیان میں کہا گیا ہے کہ امریکہ اپنی اقتصادی مہم کو ایرانی عوام کے خلاف ایک بے رحم ہتھیار کے طور پر استعمال کر رہا ہے، جس سے لاکھوں شہریوں کی صحت اور روزگار کو شدید خطرات لاحق ہیں۔ بیان میں واضح کیا گیا کہ امریکی پابندیوں پر عمل کرنا کسی کی غیر قانونی مرضی کو مسلط کرنے کی سازش میں شرکت کے مترادف ہوگا۔ ایران نے اقوامِ متحدہ اور عالمی برادری سے امریکی پابندیوں پر عمل درآمد سے گریز کرنے اور قانون کی عملداری کے لیے اقدامات کا مطالبہ کرتے ہوئے عزم ظاہر کیا ہے کہ امریکہ اور اسرائیل کے فوجی و معاشی حملوں کے خلاف ملکی دفاع کے لیے تمام تر صلاحیتیں بروئے کار لائی جائیں گی۔