پاکستان کے پورٹ سسٹم میں اصلاحات، 85 اقدامات پر عملدرآمد

اسلام آباد: پاکستان کے پورٹ سسٹم کو زیادہ فعال، شفاف اور بین الاقوامی معیار کے مطابق جدید بنانے کے لیے تجویز کردہ 99 قابلِ عمل اصلاحاتی اقدامات میں سے 85 پر کامیابی سے عملدرآمد مکمل کر لیا گیا ہے۔

حکام کے مطابق انجام دی جانے والی اصلاحات کے تحت بندرگاہوں کی گہرائی (Drafting Capacity) کو برقرار رکھنے کے لیے بلا تعطل ڈریجنگ، کارگو فلو کی بہتری اور پورٹ پر رش کم کرنے کے لیے اہم عملی اقدامات کیے گئے ہیں۔ پورٹ کنجیشن کو ختم کرنے کی حکمتِ عملی کے تحت طویل عرصے سے بندرگاہوں پر موجود 2 ہزار سے زائد کنٹینرز کو کامیابی کے ساتھ آف ڈاٹ (Off-dock) کی ترسیل گاہوں میں منتقل کر دیا گیا ہے، جس سے پورٹ کے آپریشنل رقبے میں نمایاں بہتری آئی ہے۔

علاوہ ازیں، تجارتی عمل کو آسان بنانے کے لیے ڈیوٹی ڈرا بیک کلیمز (Duty Drawback Claims) کی مکمل آٹومیشن اور پیپر لیس/فیس لیس کسٹمز نظام متعارف کرایا گیا ہے۔ پورٹ آپریشنز کی اس ڈیجیٹلائزیشن اور جدید کسٹمز سسٹم کے نفاذ سے کسٹمز کلیئرنس کی رفتار تیز، شفافیت میں اضافہ اور کاروباری برادری کے لیے تجارتی نقل و حمل میں زبردست آسانیاں پیدا ہوئی ہیں۔