ایران نے امریکی پابندیوں کو ریاستی دہشتگردی قرار دے دیا

تہران: ایران نے امریکی معاشی پابندیوں اور اقتصادی اقدامات کو شدید تنقید کا نشانہ بناتے ہوئے انہیں “ریاستی دہشتگردی”، غیر قانونی اور قابلِ مذمت قرار دیا ہے، اور الزام عائد کیا ہے کہ واشنگٹن انتظامیہ معاشی دباؤ کو ایرانی عوام کے خلاف بے رحم ہتھیار کے طور پر استعمال کر رہی ہے۔

ایرانی وزارتِ خارجہ کی جانب سے جاری کردہ رسمی بیان میں کہا گیا ہے کہ یکطرفہ امریکی پابندیاں لاکھوں ایرانی شہریوں کی صحت، بنیادی معیشت اور روزگار کو سنگین خطرات سے دوچار کر رہی ہیں۔ بیان میں خبردار کیا گیا کہ کسی بھی ملک کی جانب سے ان پابندیوں پر عمل درآمد کرنا امریکی غیر قانونی احکامات اور جرم میں شراکت داری کے مترادف تصور ہو گا۔

تہران نے اقوامِ متحدہ (UN) اور عالمی برادری پر زور دیا کہ وہ قانون کی عملداری برقرار رکھنے کے لیے بلا تاخیر اقدامات کریں، کیونکہ امریکی اقدامات بین الاقوامی قوانین اور انسانيت کے خلاف ورزی کے زمرے میں آتے ہیں۔ ایرانی وزارتِ خارجہ نے مزید واضح کیا کہ ملک کا دفاع یقینی بنانے کے لیے امریکہ اور اسرائیل کے کسی بھی عسکری یا معاشی حملے کے خلاف تمام تر قومی صلاحیتیں بروئے کار لائی جائیں گی۔