برطانیہ کے ہوائی اڈوں پر سائبر حملہ، صارفین کا حساس ڈیٹا چوری

برطانیہ کے تین بڑے ہوائی اڈوں مانچسٹر، اسٹینسٹڈ اور ایسٹ مڈلینڈز پر سائبر حملے کے بعد 87 لاکھ صارفین کا حساس ڈیٹا چوری ہونے کا انکشاف ہوا ہے۔ برطانوی میڈیا کے مطابق ہیکرز نے ای میلز، فون نمبرز، گاڑیوں کی رجسٹریشن، پوسٹ کوڈز کے علاوہ کار پارکنگ، لاؤنج، فاسٹ ٹریک بکنگز اور ایئرپورٹ وائی فائی صارفین کا ڈیٹا بھی حاصل کر لیا ہے۔ مانچسٹر ایئرپورٹس گروپ کا کہنا ہے کہ خطرے کی نشاندہی ہوتے ہی فوری اقدامات کے ذریعے اس پر قابو پا لیا گیا ہے اور ماہرین کی مدد سے نظام کی سکیورٹی مضبوط بنائی جا رہی ہے، جبکہ متعلقہ حکام کو آگاہ کر کے معاملے کی جامع تحقیقات شروع کر دی گئی ہیں۔