قطری وزیراعظم کا دورہ تہران، آبنائے ہرمز میں بحری آمدورفت بحال کرنے پر بات چیت

قطر کے وزیراعظم اور وزیر خارجہ شیخ محمد بن عبدالرحمان آل ثانی نے تہران کا سرکاری دورہ کیا، جہاں انہوں نے ایرانی وزیر خارجہ عباس عراقچی اور اعلیٰ ایرانی قیادت سے ملاقاتوں میں مشرق وسطیٰ کی کشیدہ صورتحال پر تفصیلی تبادلہ خیال کیا۔ قطری وزارت خارجہ کے مطابق مذاکرات کے دوران آبنائے ہرمز سے بارودی سرنگیں صاف کرنے کے لیے قطر اور ایران کے مشترکہ منصوبے اور تجارتی جہاز رانی کو محفوظ بنانے کے لیے عارضی بحری راہداری کے قائم کرنے پر بات چیت کی گئی۔ دونوں رہنماؤں نے خطے میں جاری کشیدگی میں کمی، پائیدار سلامتی اور مذاکرات کے لیے سازگار ماحول پیدا کرنے کی کوششوں کو تیز کرنے پر اتفاق کیا۔ واضح رہے کہ عالمی سطح پر 20 فیصد تیل اور ایل این جی کی ترسیل کے لیے اہم ترین بحری گزرگاہ آبنائے ہرمز میں کشیدگی کے باعث تجارتی جہاز رانی شدید متاثر ہوئی ہے۔