روس کے معدنی ذخائر میں بڑا اضافہ، ہیروں کے ذخائر 10 کروڑ قیراط سے متجاوز

روس کے ہیروں، سونے، چاندی اور دیگر اہم معدنی وسائل کے ذخائر میں رواں سال کی پہلی ششماہی کے دوران ریکارڈ اضافہ دیکھا گیا ہے۔ روس کی وفاقی ایجنسی برائے معدنی وسائل “روسنیدرا” کے سربراہ اولیگ کازانوف کے مطابق رواں سال کے آغاز سے اب تک ملک کے ہیروں کے ذخائر میں 102.4 ملین (10 کروڑ 24 لاکھ) قیراط کا بڑا اضافہ ریکارڈ کیا گیا ہے۔ اس کے علاوہ سونے کے ذخائر میں 176.6 میٹرک ٹن، چاندی میں 1,400 میٹرک ٹن اور پلاٹینم گروپ دھاتوں میں 12.1 میٹرک ٹن کا اضافہ ہوا ہے۔ کازانوف نے بتایا کہ تانبے، زنک، سیسے، خام لوہے اور کوئلے کے ذخائر میں بھی نمایاں بہتری آئی ہے، جس کی بڑی وجہ صرف نئی دریافتیں ہی نہیں بلکہ موجودہ ذخائر کی دوبارہ ارضیاتی چھان بین اور جائزہ ہے۔