ایرانی فوج مکمل طور پر چوکس، فضائی دفاعی صلاحیتیں مزید بہتر بنا رہے ہیں: علی رضا الہامی

تہران: ایرانی فوج کے ایئر ڈیفنس فورس کے کمانڈر بریگیڈیئر جنرل علی رضا الہامی نے کہا ہے کہ ایرانی مسلح افواج مکمل طور پر چوکس ہیں اور ملکی سرحدوں کی فضائی نگہبانی کے لیے اپنی دفاعی صلاحیتوں کو مسلسل جدید اور فعال بنا رہی ہیں。 میڈیا سے گفتگو کرتے ہوئے بریگیڈیئر جنرل علی رضا الہامی نے بتایا کہ حالیہ جنگی تجربات نے ایران کو فضائی دفاعی شعبے میں انتہائی اہم اور مفید تجربات فراہم کیے ہیں۔ ان تجربات کی روشنی میں دفاعی حکمتِ عملی، نظاموں کی تیاری اور ان کی سرحدوں پر تعیناتی میں ضروری تبدیلیاں کی گئی ہیں تاکہ دشمن کے کسی بھی اقدام کا موثر جواب دیا جا سکے۔ ایرانی کمانڈر نے اس بات پر زور دیا کہ ایران اس وقت اپنی دفاعی ضروریات اور آلات کے لیے 100 فیصد ملکی صلاحیتوں اور اندرونی سائنس دانوں کی مہارت پر انحصار کر رہا ہے۔ انہوں نے مزید کہا کہ ایرانی فضائی دفاعی نظام ملکی سرحدوں کی 24 گھنٹے مکمل نگرانی کر رہا ہے اور کسی بھی نامساعد صورتحال کا مقابلہ کرنے کے لیے ہر وقت تیار ہے۔