ایران جنگ: دبئی ایئرپورٹ پر مسافروں کی آمد میں ایک تہائی کمی

دبئی: دبئی کے بین الاقوامی ایئرپورٹ (DXB) پر رواں سال 2026ء کی پہلی ششماہی کے دوران مسافروں کی آمد میں تقریباً ایک تہائی (33 فیصد) کی نمایاں کمی ریکارڈ کی گئی ہے۔

ایئرپورٹ انتظامیہ کے مطابق 2026ء کے پہلے چھ ماہ کے دوران 3 کروڑ 15 لاکھ مسافروں نے دبئی ایئرپورٹ کو استعمال کیا، جبکہ گزشتہ سال اسی عرصے میں یہ تعداد 4 کروڑ 60 لاکھ تھی، جس کے بعد مسافروں کی ٹریفک میں بڑی کمی واقع ہوئی ہے۔

عرب میڈیا کی رپورٹ کے مطابق ایران، امریکا اور اسرائیل کے درمیان جاری علاقائی کشیدگی کے باعث مشرقِ وسطیٰ میں فضائی سفر شدید متاثر ہوا ہے۔ علاوہ ازیں، ایندھن کی عالمی قیمتوں میں اضافہ بھی دنیا بھر میں ہوائی جہازوں کے کرائیوں میں اضافے کی اہم وجہ بنا ہے۔

رپورٹس میں مزید کہا گیا ہے کہ خطے میں جاری کشیدگی اور خلیجی ممالک کی فضائی حددو پر اثرات نے عالمی ہوابازی، معیشت اور سفر پر گہرے اثرات مرتب کیے ہیں جس سے فلائٹس اور مسافروں کی نقل و حرکت میں کمی آئی ہے۔