پمز واقعہ: لاپرواہی ثابت ہوئی تو کسی کو نہیں چھوڑا جائے گا، وفاقی وزیر صحت

اسلام آباد: وفاقی وزیرِ صحت مصطفیٰ کمال نے تصدیق کی ہے کہ پمز ہسپتال (PIMS) کے بچوں کے انتہائی نگہداشت وارڈ (NICU) میں آگ اے سی شارٹ سرکٹ/بلاسٹ کے باعث لگی، جو وارڈ میں آکسیجن سلنڈرز اور لائنوں کی موجودگی کے باعث تیزی سے پھیل گئی۔

میڈیا سے گفتگو کرتے ہوئے وفاقی وزیر نے 14 نومولود بچوں کی شہادت کی تصدیق کی اور اس واقعے کو انتہائی دلخراش سانحہ قرار دیا۔ انہوں نے واضح کیا کہ معاملے کی شفاف تحقیقات کی جائیں گی اور اگر کسی کی لاپرواہی سامنے آئی تو سخت ترین کارروائی ہوگی، چاہے اس میں ان کی اپنی ہی غلطی کیوں نہ ہو۔

سیکرٹری ہیلتھ محمد اسلم غوری کے مطابق آتشزدگی کے وقت نرسری میں 15 بچے موجود تھے اور ڈیوٹی پر 4 اہلکار تعینات تھے۔ بدقسمتی سے صرف ایک بچے کو ہی بچایا جا سکا جبکہ 14 بچے جھلس کر اور دم گھٹنے سے جاں بحق ہو گئے۔

وفاقی وزیرِ صحت نے بتایا کہ آگ لگتے ہی ہسپتال کی بجلی منقطع ہو گئی تھی، جس کے بعد عملے نے فوری طور پر ریسکیو ٹیموں کو بلایا، تاہم آکسیجن کی فراہمی کی وجہ سے آگ انتہائی شدت اختیار کر چکی تھی۔ ڈی جی ہیلتھ اور سیکرٹری ہسپتال میں موجود ہیں اور انتظامیہ متاثرہ والدین کے ساتھ مکمل رابطے میں ہے۔