ملک بھر میں عید میلاد النبیﷺ مذہبی جوش و جذبے کے ساتھ منائی جا رہی ہے

سرورِ کونین، محسنِ انسانیت حضرت محمد مصطفیٰ ﷺ کا یومِ ولادتِ باسعادت ملک بھر میں انتہائی مذہبی جوش و جذبے، عقیدت و احترام کے ساتھ منایا جا رہا ہے۔ دن کا آغاز وفاقی دارالحکومت میں 31 اور صوبائی دارالحکومتوں میں 21، 21 توپوں کی سلامی سے ہوا، جبکہ نمازِ فجر کے بعد مساجد میں ملک کی سلامتی، ترقی اور امتِ مسلمہ کے اتحاد کے لیے خصوصی دعائیں کی گئیں۔ اس پرمسرت موقع پر تمام شہروں کی گلیوں، محلے، سرکاری و نجی عمارتوں کو برقی قمقموں اور سبز پرچموں سے سجا دیا گیا ہے۔ صدر مملکت آصف علی زرداری اور وزیراعظم شہباز شریف نے قوم کو مبارکباد دیتے ہوئے اپنے پیغامات میں اس امر پر زور دیا ہے کہ پاکستان کی فلاح، استحکام اور پرامن معاشرے کی تشکیل کے لیے نوجوان نسل کو سیرتِ طیبہ ﷺ اور اسوۂ حسنہ کو اپنے انفرادی و اجتماعی طرزِ عمل کا حصہ بنانا ہو گا۔