جنگ کے دوران انتخابات سے یوکرین تباہ، عوام تقسیم ہو جائے گی: زیلنسکی

یوکرین کے صدر ولودیومیر زیلنسکی نے کہا ہے کہ روس کے ساتھ جاری جنگ کے دوران ملک میں انتخابات کا انعقاد یوکرین کو تباہی کی طرف دھکیل سکتا ہے، کیونکہ اس سے عوام اور ریاست میں شدید تقسیم پیدا ہوگی۔ میڈیا سے گفتگو کرتے ہوئے انہوں نے واضح کیا کہ اس وقت انتخابات کا انعقاد ریاست کے لیے ایک تباہ کن ‘سونامی’ ثابت ہو سکتا ہے۔ انہوں نے مزید کہا کہ اگر اتحادی ممالک انتخابات کے لیے موثر عسکری اور سیکیورٹی ضمانتیں فراہم کریں تو ہی اس پر غور ممکن ہے، تاہم ابھی تک کسی بھی ملک نے ایسا کوئی خاکہ پیش نہیں کیا۔ یوکرینی صدر کا کہنا تھا کہ ان کی تمام تر توجہ اور حکمت عملی جنگ کے خاتمے، ملک کی آزادی اور خودمختاری کے تحفظ پر مرکوز ہے، جبکہ یوکرینی آئین و قانون کے تحت بھی جنگی حالت کے دوران الیکشن کروانے پر پابندی عائد ہے۔