دفاعی صنعت جدید ہتھیاروں کے نظام اور فوجی سازوسامان تیار کر رہی ہے، ایرانی وزارت دفاع

ترجمان ایرانی وزارتِ دفاع جنرل رضا طلائی نے انکشاف کیا ہے کہ ایران کی دفاعی صنعت اس وقت 1,000 سے زائد جدید ترین ہتھیاروں کے نظام اور عسکری سازوسامان کی مقامی سطح پر تیاری میں مصروف ہے۔ ایک بیان میں ان کا کہنا تھا کہ 1979ء سے قبل ایران کی پیداوار صرف 31 سادہ اشیاء تک محدود تھی، تاہم آج صورتحال مکمل بدل چکی ہے اور ایران ایک جامع دفاعی صنعت رکھنے والی قوت بن کر ابھرا ہے۔ انہوں نے بتایا کہ ملک میں اب نہ صرف بنیادی عسکری سامان بلکہ بیلسٹک میزائل، ڈرونز، فضائی دفاعی نظام اور الیکٹرانکس بھی تیار کیے جا رہے ہیں۔ جنرل رضا طلائی کے مطابق میزائل ٹیکنالوجی کی شعبے میں ایران دنیا کی 10 بڑی طاقتوں میں شامل ہو چکا ہے اور شہاب، قدر، عماد اور خیبر شکن جیسے جدید ترین میزائلوں کے متعدد ورژن تیار کیے جا چکے ہیں۔