ایرانی ہیکرز کے برطانیہ پر پہلے سائبر حملے کا انکشاف، پاور پلانٹ 4 روز تک بند رہا

برطانوی اخبار ‘دی ٹیلی گراف’ نے انکشاف کیا ہے کہ ایرانی حکومت اور پاسداران انقلاب سے وابستہ ہیکرز نے ایک غیر معمولی سائبر حملے کے ذریعے برطانیہ کے ایک پاور پلانٹ کو 4 دن کے لیے مکمل طور پر غیر فعال کر دیا تھا۔ رپورٹ کے مطابق یہ پہلا موقع ہے کہ ہیکرز برطانیہ کے کسی اہم پاور پلانٹ کو بند کرنے میں کامیاب ہوئے ہیں۔ اگرچہ سیکورٹی خدشات کے پیشِ نظر متاثرہ پاور پلانٹ کا نام ظاہر نہیں کیا گیا، تاہم ذرائع کے مطابق یہ ایک نسبتاً چھوٹا پلانٹ تھا جس کی بندش سے مجموعی قومی گرڈ کو نقصان نہیں پہنچا۔ دفاعی ماہرین کا ماننا ہے کہ اس سائبر حملے کا بنیادی مقصد برطانیہ کے حساس انفراسٹرکچر تک رسائی اور اسے نقصان پہنچانے کی صلاحیت کا مظاہرہ کرنا تھا۔