تجارتی مذاکرات ناکام، کینیڈا کا بھی امریکا پر 50 فیصد ٹیرف لگانے کا اعلان

امریکہ اور کینیڈا کے درمیان جاری اہم تجارتی مذاکرات کسی حتمی نتیجے پر پہنچے بغیر ناکام ہو گئے ہیں، جس کے ردِعمل میں کینیڈا نے بھی امریکی مصنوعات پر 50 فیصد ٹیرف عائد کرنے کا اعلان کر دیا ہے۔ کینیڈین وزیراعظم مارک کارنے نے سوشل میڈیا پلیٹ فارم ایکس (X) پر جاری اپنے بیان میں کہا کہ امریکہ کے ساتھ تجارتی مذاکرات ختم کر دیے گئے ہیں اور امریکی اشیاء پر ‘ڈالر کے بدلے ڈالر’ کے حساب سے جوابی ٹیرف لگایا جائے گا۔ انہوں نے امریکی موقف پر تنقید کرتے ہوئے کہا کہ آخری لمحات میں شرائط تبدیل کرنا غیر منصفانہ اور ناقابلِ قبول ہے۔ دوسری جانب امریکی تجارتی نمائندے جیمیسن گریئر نے مذاکرات کی ناکامی کا تمام تر ملبہ کینیڈا پر ڈالتے ہوئے الزام عائد کیا کہ کینیڈا معاہدے کی طے شدہ شرائط سے پیچھے ہٹا ہے۔ خبر ایجنسی کے مطابق کینیڈین اشیاء پر امریکہ کا عائد کردہ 50 فیصد ٹیرف پہلے ہی نافذ العمل ہو چکا ہے۔