وزیر اعظم کی ترکمانستان کے صدر سے ملاقات، دوطرفہ تعاون کے فروغ پر اتفاق

وزیر اعظم محمد شہباز شریف نے اشک آباد میں ترکمانستان کے صدر سردار بردی محمدوف سے دوطرفہ ملاقات کی، جس میں دونوں ممالک کے تعلقات، علاقائی تعاون اور باہمی دلچسپی کے امور پر تفصیلی تبادلۂ خیال کیا گیا۔

ملاقات کے دوران وزیراعظم نے ترکمانستان کی مستقل غیر جانبداری کی 30 ویں سالگرہ اور اقوام متحدہ کی جانب سے 2025 کو امن اور اعتماد کا بین الاقوامی سال قرار دینے پر ترکمان صدر کو مبارکباد پیش کی۔وزیراعظم نے پاکستان اور ترکمانستان کے درمیان تاریخی اور برادرانہ تعلقات کی اہمیت پر زور دیتے ہوئے تجارتی و اقتصادی شعبوں میں تعاون بڑھانے کے عزم کا اظہار کیا۔ انہوں نے رواں برس ایران–اسرائیل کشیدگی کے دوران پاکستانی شہریوں کو ایران سے محفوظ نکالنے میں ترکمان حکومت کے تعاون پر خصوصی شکریہ بھی ادا کیا۔وزیر اعظم نے ترکمانستان کے ساتھ زمینی اور سمندری راستوں کے ذریعے روابط کے فروغ کی خواہش کا اعادہ کیا۔ انہوں نے کہا کہ کراچی اور گوادر کی بندرگاہیں ترکمانستان کے لیے جنوبی ایشیا اور خطے سے آگے تک رسائی بڑھانے کا بہترین ذریعہ ثابت ہوسکتی ہیں۔وزیراعظم نے ترکمانستان کے عوام کے قومی رہنما گربنگولی بردی محمدوف کے لیے نیک خواہشات کا اظہار کیا اور صدر سردار بردی محمدوف کو آئندہ برس پاکستان کے سرکاری دورے کی دعوت بھی دہرائی۔ترکمان صدر نے وزیر اعظم کے دورے اور امن و اعتماد کے بین الاقوامی فورم میں شرکت پر شکریہ ادا کرتے ہوئے کہا کہ ترکمانستان، پاکستان کے ساتھ باہمی دلچسپی کے شعبوں میں تعاون بڑھانے کا خواہاں ہے۔وزیر اعظم شہباز شریف دو روزہ سرکاری دورے پر ترکمانستان میں موجود ہیں جہاں وہ 12 دسمبر 2025 تک جاری امن و اعتماد کے عالمی سال، غیرجانبداری کے عالمی دن اور ترکمانستان کی مستقل غیرجانبداری کی 30 ویں سالگرہ کے موقع پر ہونے والے بین الاقوامی فورم میں شرکت کر رہے ہیں۔وزیراعظم کے ہمراہ نائب وزیراعظم و وزیر خارجہ سینیٹر اسحاق ڈار، وزیر توانائی اویس احمد خان لغاری، وزیر اطلاعات عطاء تارڑ سمیت اعلیٰ سرکاری افسران بھی شریک تھے