کینیا میں سیاحوں کا ہیلی کاپٹر گر کر تباہ، 5 امریکیوں سمیت 7 افراد ہلاک

کینیا میں سیاحوں کو لے جانے والا ایک ہیلی کاپٹر حادثے کا شکار ہو کر تباہ ہو گیا، جس کے نتیجے میں ایکواڈور کی انٹیلی جنس کے سربراہ اور ان کی اہلیہ، نیز 5 امریکی شہریوں سمیت تمام 7 افراد ہلاک ہو گئے۔

امریکی محکمہ خارجہ کے ترجمان نے حادثے میں 5 امریکی شہریوں کی ہلاکت کی باضابطہ تصدیق کرتے ہوئے کہا ہے کہ امریکی سفارت خانہ مقامی حکام سے مسلسل رابطے میں ہے اور متاثرہ خاندانوں کو قونصلر معاونت فراہم کی جا رہی ہے۔

کینیا سول ایوی ایشن اتھارٹی کے مطابق یہ ہیلی کاپٹر لوئیسابا (Loisaba) کے محفوظ وائلڈ لائف علاقے سے ‘ایواسو نیرو’ کی جانب تفریحی فضائی سفر (سائٹ سینگ فلائٹ) پر روانہ ہوا تھا کہ اچانک حادثے کا شکار ہو گیا۔ حکام کے مطابق حادثے کی حتمی وجوہات ابھی سامنے نہیں آسکیں، تاہم واقعے کی تحقیقات کا آغاز کر دیا گیا ہے۔