میر رضا قتل کیس، جبران ناصر کا وزیراعلیٰ سندھ کو خط، تفتیشی بے ضابطگیوں کی تحقیقات کا مطالبہ

میر رضا کے والد کے وکیل جبران ناصر ایڈووکیٹ نے کیس کی تفتیش میں سنگین بے ضابطگیوں اور کوتاہیوں پر وزیراعلیٰ سندھ کو باقاعدہ خط ارسال کر دیا ہے۔ خط میں جبران ناصر نے وزیراعلیٰ سندھ سے معاملے کی براہِ راست نگرانی کرنے اور غفلت برتنے والے پولیس افسران کے خلاف سخت اقدام کرنے کا مطالبہ کیا ہے۔

جبران ناصر کا کہنا تھا کہ نئی تفتیشی ٹیم کے قیام کے باوجود تحقیقات قتل کی اصل سمت میں آگے بڑھنے کے بجائے خودکشی کے سابقہ مؤقف کے گرد گھوم رہی ہے۔ انہوں نے ڈی آئی جی ایسٹ، ایس ایس پی ایس آئی یو اور ایس ایس پی ایسٹ سمیت دیگر متعلقہ پولیس افسران پر شواہد ضائع کرنے اور نااہلی کے الزامات عائد کرتے ہوئے انہیں عہدوں سے معطل کرنے اور شفاف انکوائری کا مطالبہ کیا۔ وکیل کا کہنا تھا کہ شواہد کی لیبارٹری تاخیر سے منتقلی، میڈیا کو سی سی ٹی وی فوٹیجز جاری کرنے اور دوستانہ بیانات پر دباؤ ڈالنے سے پولیس کے کردار پر شدید سوالات اٹھتے ہیں۔ انہوں نے واضح کیا کہ مقتول کے اہل خانہ شفاف تحقیقات کے ذریعے اغوا، تشدد اور قتل کے اصل حقائق سامنے لانا چاہتے ہیں، اور اگر سندھ پولیس ناکام رہی تو وفاقی اداروں کی معاونت سے جے آئی ٹی (JIT) تشکیل دی جائے۔