اشیائے خورو نوش کے 491 نمونوں کی جانچ، متعدد اشیا غیر معیاری ہونے کا انکشاف

پاکستان کونسل آف سائنٹیفک اینڈ انڈسٹریل ریسرچ کی جانب سے ملک بھر سے حاصل کردہ گھی، خوردنی تیل اور دودھ کی مصنوعات کے 491 نمونوں کی لیبارٹری جانچ کے دوران سنسنی خیز انکشافات سامنے آئے ہیں۔ وفاقی وزیر منصوبہ بندی و ترقی احسن اقبال کی زیرِ صدارت منعقدہ نیشنل پرائس مانیٹرنگ کمیٹی کے اجلاس میں پیش کی گئی رپورٹ کے مطابق، مارکیٹ میں فروخت ہونے والی متعدد بنیادی اشیائے خوردونوش معیار پر پورا نہیں اتریں۔

رپورٹ کے مطابق، بناسپتی گھی کے 26 نمونوں میں ٹرانس کی مقدار مقررہ قانونی حد سے کئی گنا زیادہ پائی گئی، جبکہ گھی کے 46 نمونوں میں وٹامن اے مکمل طور پر غائب تھا۔ اس کے علاوہ متعدد نمونوں میں نمی اور ناگوار بدبو بھی پائی گئی۔ صوبائی سطح پر دیکھا جائے تو بلوچستان میں گھی کے 79.4 فیصد، سندھ میں 63.3 فیصد اور خیبرپختونخوا میں 58.3 فیصد نمونے غیر معیاری نکلے۔ خیبرپختونخوا میں پیک شدہ دودھ کے تمام حاصل کردہ نمونے معیار پر پورا نہ اتر سکے، جبکہ ملک بھر سے پیک شدہ دودھ کے 26 نمونوں میں چکنائی اور پاؤڈر والے دودھ کے 8 نمونوں میں پروٹین کی مقدار مطلوبہ حد سے کم ریکارڈ کی گئی۔

وفاقی وزیر احسن اقبال نے رپورٹ پر گہری تشویش کا اظہار کرتے ہوئے کہا کہ نوجوانوں میں دل کے امراض اور دیگر مہلک بیماریوں میں اضافے کی بڑی وجہ غیر معیاری اور ملاوٹ شدہ خوراک ہے۔ انہوں نے چاروں صوبوں کی فوڈ اتھارٹیز کے ساتھ مل کر ایک مشترکہ کوالٹی کنٹرول اور سہ ماہی مانیٹرنگ نظام قائم کرنے کی ہدایت کی اور غیر معیاری مصنوعات تیار کرنے والے مینوفیکچررز کے خلاف فوری اور سخت قانونی کارروائی کا حکم دیا۔ اس کے علاوہ اجلاس میں اوگرا کی رپورٹ پر نوٹس لیتے ہوئے ایل پی جی (LPG) کی سرکاری اور مارکیٹ قیمتوں کے فرق کو بھی تین روز کے اندر حل کرنے کی ہدایت جاری کی گئی۔