روس کے یوکرین کے شمال مشرقی علاقے میں میزائل حملے، 10 افراد ہلاک، 18 زخمی

یوکرین کے شمال مشرقی علاقے خارکیف میں شدید روسی میزائل حملے کے نتیجے میں کم از کم 10 افراد ہلاک اور 18 زخمی ہو گئے ہیں۔ حملے کے مقام پر تباہ شدہ عمارتیں، جلی ہوئی گاڑیاں اور لاشیں بکھری نظر آئیں، جبکہ علاقے میں شدید خوف و ہراس پھیل گیا۔

حکام کے مطابق، اس حملے میں 10 رہائشی مکانات، ایک کیفے، پوسٹ آفس، 5 دکانیں اور 15 کے قریب گاڑیاں تباہ ہوئیں۔ ابتدائی تحقیقاتی رپورٹ میں بتایا گیا ہے کہ روس نے اس کارروائی میں دو بینڈ رول کروز میزائل (Bandroll Cruise Missiles) استعمال کیے۔

 یوکرین کے صدر وولودیومیر زیلنسکی نے اس حملے کی شدید الفاظ میں مذمت کرتے ہوئے کہا کہ روس نے جان بوجھ کر ایک ایسے مصروف چوراہے کو نشانہ بنایا جہاں پوسٹ آفس، کیفے، دکانیں اور قریبی رہائشی عمارتیں موجود تھیں۔ انہوں نے عزم ظاہر کیا کہ یوکرین روس کے اس دردناک حملے کا بھرپور اور موثر جواب دے گا۔