غزہ میں اسرائیلی فضائی حملہ، 6 فلسطینی شہید، 14 زخمی

مغربی غزہ میں بحری بندرگاہ کے قریب اسرائیلی فضائیہ کی بمباری کے نتیجے میں 6 فلسطینی شہید جبکہ 14 زخمی ہو گئے ہیں۔ عرب میڈیا کی رپورٹس کے مطابق اسرائیلی جنگی طیاروں نے بندرگاہ کے قریب واقع ایک کیفے کو نشانہ بنایا، جہاں عام شہری اور مقامی افراد موجود تھے۔

اسرائیلی فوج نے حملے کی تصدیق کرتے ہوئے دعویٰ کیا ہے کہ اس کارروائی کا ہدف حماس کے کمانڈر اور جنگجو تھے، جبکہ حملے میں 7 اکتوبر 2023ء کے کارروائی میں ملوث ایک مبینہ شخص بھی مارا گیا ہے۔

عرب میڈیا کے مطابق یہ بمباری امریکی صدر کے سابق مشیر جیرڈ کشنر کے دورہِ غزہ کے محض ایک روز بعد سامنے آئی ہے، جس کے باعث خطے میں سیکیورٹی کشیدگی اور ناہمواری میں مزید اضافے کا خدشہ ظاہر کیا جا رہا ہے۔