ٹرمپ نے آبنائے ہرمز کو ’نیا امریکی علاقہ‘ قرار دے دیا، ایران کا شدید ردعمل

امریکی صدر ڈونلڈ ٹرمپ نے سوشل میڈیا پلیٹ فارم ‘ٹروتھ سوشل’ پر مشرقِ وسطیٰ کا ایک نقشہ شیئر کرتے ہوئے آبنائے ہرمز کے علاقے کو “نیو یو ایس ٹیریٹری” (امریکا کا نیا علاقہ) کے طور پر پیش کیا ہے اور اس اہم بحری گزرگاہ پر مکمل امریکی کنٹرول کا اشارہ دیا ہے۔ یہ دعویٰ ایک ایسے وقت میں سامنے آیا ہے جب خطے میں امریکا اور ایران کے درمیان ناکہ بندی اور بحری آمدورفت سے متعلق شدید کشیدگی برقرار ہے۔ دوسری جانب، ایرانی حکام نے ٹرمپ کے اس دعوے کو حقیقت سے دور قرار دے کر مسترد کر دیا ہے اور واضح کیا ہے کہ جب تک امریکا ایرانی بندرگاہوں کی ناکہ بندی ختم اور تیل پر عائد پابندیاں اٹھا نہیں لیتا، تب تک آبنائے ہرمز کو مکمل طور پر نہیں کھولا جائے گا۔