آن لائن فراڈ کیس: 284 غیر ملکیوں کی حراست کیلئے نجی پلازہ دوبارہ سب جیل قرار

اسلام آباد کے علاقے گلبرگ گرین کے ایک نجی پلازے کو آن لائن فراڈ اور مبینہ فحش مواد پھیلانے کے الزام میں گرفتار 284 غیر ملکی شہریوں کو رکھنے کے لیے دوبارہ سب جیل قرار دے دیا گیا ہے۔ چیف کمشنر آفس کی جانب سے جاری کردہ نوٹیفکیشن کے مطابق، ویتنام، انڈونیشیا اور چین سے تعلق رکھنے والے ان شہریوں پر جعلی ایپلی کیشنز کے ذریعے سرمائے کا لالچ دے کر فراڈ کرنے کا الزام ہے، جو زیادہ تر سیاحتی ویزوں پر پاکستان میں قیام پذیر تھے۔ ایف آئی اے کو ان کی سیکیورٹی، انتظامی امور اور ملک بدری کے تمام قانونی تقاضے پورے کرنے کی ذمہ داری سونپی گئی ہے۔ واضح رہے کہ اس سے قبل 11 اگست کو بھی اس پلازے کو سب جیل بنایا گیا تھا جسے 14 اگست کو منسوخ کر دیا گیا تھا، تاہم اب نیا باقاعدہ نوٹیفکیشن جاری کر کے عمل درآمد شروع کر دیا گیا ہے۔