یوکرین کے روس میں 20 سے زائد علاقوں پر ڈرون حملے، 399 ڈرون تباہ

روسی وزارتِ دفاع نے دعویٰ کیا ہے کہ اس کے فضائی دفاعی نظام نے رات بھر کی کارروائیوں کے دوران روس کے 21 مختلف علاقوں، کریمیا اور بحیرہ اسود کی فضائی حددود میں یوکرین کے 399 ڈرونز کو کامیابی سے تباہ کر دیا ہے۔ تاہم، ڈرونز کے ملبے اور حملوں کے نتیجے میں ریازان ریجن کے شہر ساسوو میں روسی ٹیکنالوجی کمپنی “یانڈیکس” (Yandex) کے ڈیٹا سینٹر میں شدید آگ بھڑک اٹھی، جس سے کلاؤڈ انفراسٹرکچر متاثر ہوا اور کمپنی کی سروسز معطل کرنا پڑیں۔

یانڈیکس کے مطابق واقعے میں کوئی جانی نقصان نہیں ہوا ہے اور ڈیٹا کا بوجھ متبادل زونز پر منتقل کر دیا گیا ہے۔ مزید برآں، ڈرون حملوں کے باعث متعدد علاقوں میں صنعتی تنصیبات، رہائشی عمارتوں اور بجلی کی لائنوں کو نقصان پہنچا، جبکہ کریمیا کے مختلف حصوں میں برقی رو معطل ہو گئی۔ حملوں کے دوران ڈونیٹسک اور دیگر سرحدی علاقوں میں مسافر بسیں متاثر ہوئیں اور ایک شہری کے زخمی ہونے کی تصدیق کی گئی ہے۔