امریکا سے کوئی رابطہ نہیں ہوا، ایرانی پاسداران انقلاب نے ٹرمپ کے دعوے کی تردید کردی

ایرانی پاسدارانِ انقلاب کے ترجمان بریگیڈیئر جنرل حسین محبی نے امریکی صدر ڈونلڈ ٹرمپ کے پاسدارانِ انقلاب کے ساتھ براہِ راست پسِ پردہ رابطوں کے دعوے کو مکمل طور پر مسترد کر دیا ہے۔ ایرانی میڈیا کے مطابق انہوں نے واضح کیا کہ فریقین کے درمیان کوئی بات چیت نہیں ہو رہی اور ٹرمپ کے بیانات جنگ میں ناکامی کے باعث پیدا ہونے والے وہم اور توانائی کی قیمتوں کو عارضی طور پر قابو میں رکھنے کی کوشش کا نتیجہ ہیں۔ ترجمان نے امریکی صدر پر زور دیا کہ ان کے پاس اپنی شکست اور ایران کی مقررہ شرائط کو تسلیم کرنے کے علاوہ کوئی راستہ نہیں بچا۔ دوسری جانب ٹرمپ کے اس دعوے کہ واشنگٹن ایران کے ساتھ جنگ ختم کرنے میں جلدی میں نہیں ہے اور 17 اگست کو 60 روزہ مفاہمتی عمل بغیر کسی پیش رفت کے ختم ہونے سے دونوں ممالک کے درمیان شدید بداعتمادی مزید نمایاں ہو گئی ہے۔