عراق میں نائب وزیر کے گھر پر چھاپہ، لاکھوں ڈالرز اور سونے کی اینٹیں برآمد

عراق میں بدعنوانی اور مالی بے ضابطگیوں کے خلاف جاری سرکاری مہم کے تحت وفاقی کمیشن برائے دیانت داری (Federal Integrity Commission) نے ایک بڑی کامیابی حاصل کی ہے۔ بغداد انویسٹی گیشن ڈائریکٹوریٹ کی ٹیم نے عدالتی حکم کے تحت وزارتِ بجلی میں ٹرانسمیشن اور ڈسٹری بیوشن امور کے ڈپٹی وزیر خالد غازی عطیہ کے متعدد گھروں پر چھاپے مارے۔ اس تلاشی کے دوران حکام نے ایک ارب 17 کروڑ 50 لاکھ عراقی دینار اور 58 لاکھ 39 ہزار امریکی ڈالر نقد رقم کے علاوہ سونے کی سات اینٹیں اور دیگر قیمتی زیورات برآمد کر کے قبضے میں لے لیے ہیں۔ کمیشن نے اس کارروائی کی ویڈیو اور تصاویری ثبوت بھی جاری کر دیے ہیں۔ یہ کارروائی عراقی حکومت کے اس بڑے کریک ڈاؤن “آپریشن ڈان سٹرائیک” کا حصہ ہے جس کا آغاز 28 جون کو سیاست دانوں، ارکانِ پارلیمان اور کاروباری شخصیات کے خلاف کیا گیا تھا۔