اسرائیلی فوج کی لبنان میں دوبارہ جنگ شروع کرنے کی تیاری

اسرائیلی فوج نے جنوبی لبنان میں ایک بار پھر بڑے پیمانے پر فوجی کارروائیوں اور حزب اللہ کے ٹھکانوں پر مزید حملوں کی منصوبہ بندی شروع کر دی ہے۔ برطانوی خبر رساں ایجنسی کی رپورٹ کے مطابق اسرائیل حزب اللہ کے دفاعی و عسکری بنیادی ڈھانچے کو مکمل طور پر تباہ کرنے کا عزم رکھتا ہے، جب کہ جنوبی لبنان کے علاقے جبل علی الطاہر (Ali Taher Ridge) سمیت مختلف حصوں میں حزب اللہ کے درجنوں ارکان زیرِ زمین سرنگوں اور ٹھکانوں میں محصور ہیں۔ دوسری جانب تمام تر عسکری تناؤ اور جھڑپوں کے باوجود امریکی ثالثی میں اسرائیل اور لبنانی حکومت کے مابین امن و معاہدے کی سفارتی کوششیں اور مذاکرات کا سلسلہ بھی جاری ہے۔ لبنانی حکام کے مطابق 2 مارچ سے جاری مسلسل اسرائیلی فوجی کارروائیوں کے نتیجے میں اب تک 4,300 سے زائد افراد شہید، 12,000 سے زائد زخمی اور 10 لاکھ سے زائد شہری بے گھر ہو چکے ہیں۔