آئل ٹینکرز پر حالیہ حملے، آبنائے ہرمز سے تجارتی جہازوں کی آمدورفت میں شدید کمی

آئل ٹینکرز پر حالیہ حملوں کے بعد دنیا کی اہم ترین بحری گزرگاہ ’آبنائے ہرمز‘ سے تجارتی جہازوں کی آمدورفت میں شدید کمی واقع ہوئی ہے اور بحری نقل و حرکت تقریباً ٹھپ ہو کر رہ گئی ہے، جبکہ دوسری جانب مشرقِ وسطیٰ میں جنگ کے خاتمے کے لیے امریکہ اور ایران کے درمیان جاری مذاکراتی عمل بھی تعطل کا شکار ہو گیا ہے۔ شپ ٹریکنگ کمپنی ‘کپلر’ (Kpler) کے جاری کردہ اعداد و شمار کے مطابق ہفتے کے روز صرف 5 جہاز آبنائے ہرمز سے گزرے جبکہ اتوار کو کوئی بھی جہاز اس آبی گزرگاہ سے نہیں گزرا؛ اس کے برعکس گزشتہ ہفتے کے اختتام پر 31 تجارتی جہاز اس راستے سے گزرے تھے۔

اعداد و شمار کے مطابق ہفتے کے دن گزرنے والے بحری جہازوں میں ایک خالی ‘ویری لارج کروڈ کیریئر’ (VLCC) بھی شامل تھا جس کا خودکار شناختی نظام (AIS) سیکیورٹی وجوہات کی بنا پر بند کیا گیا تھا، جبکہ ایک چھوٹا ٹینکر ایرانی فیول آئل لے کر آبنائے سے باہر نکلا۔ واضح رہے کہ متحدہ عرب امارات کی جانب سے گزشتہ ہفتے ابوظہبی نیشنل آئل کمپنی (ADNOC) کے 3 جہازوں پر ہونے والے حملوں کی تصدیق کے بعد سے عالمی شپنگ کمپنیوں نے سیکیورٹی خدشات کے باعث آبنائے ہرمز سے اپنے بحری جہازوں کی نقل و حرکت عارضی طور پر معطل کر دی ہے۔