انڈونیشیا میں زلزلے سے اموات 51 ہو گئیں، 341 آفٹر شاک ریکارڈ

انڈونیشیا کے مشرقی صوبے نوسا تنگارا میں 7.7 شدت کے خوفناک زلزلے کے باعث ہلاکتوں کی تعداد بڑھ کر 51 ہو گئی ہے جبکہ 113 سے زائد افراد زخمی ہیں۔ عالمی میڈیا کے مطابق زلزلے کا مرکز مبے سے 36 کلومیٹر شمال مشرق میں 15 کلومیٹر گہرائی میں تھا، جس کے بعد 341 سے زائد آفٹر شاکس بھی ریکارڈ کیے گئے ہیں۔ زلزلے کی وجہ سے سڑکیں بند، لینڈ سلائیڈنگ اور 1,300 سے زائد مکانات تباہ ہو گئے ہیں، جبکہ 5 ہزار کے قریب افراد کو محفوظ مقامات، اسپورٹس ایرینا اور عارضی خیموں میں منتقل کیا گیا ہے۔

ڈیزاسٹر مینجمنٹ ایجنسی اور ریسکیو اداروں کے مطابق کئی افراد اب بھی ملبے تلے دبے ہوئے ہیں جن کی تلاش کے لیے 3,500 سے زائد فوجی اور پولیس اہلکار امدادی کارروائیوں میں مصروف ہیں۔ زلزلے کے بعد بجلی کا نظام درہم برہم ہونے کی وجہ سے پیٹرول پمپ اور دیگر بنیادی سہولیات متاثر ہیں، جس کے پیشِ نظر صوبائی حکومت کی جانب سے ہنگامی حالت (Emergency State) نافذ کرنے پر غور کیا جا رہا ہے۔ یہ 2022 کے بعد انڈونیشیا میں آنے والا سب سے تباہ کن اور ہلاکت خیز زلزلہ قرار دیا جا رہا ہے۔