آبنائے ہرمز امریکی علاقہ بنانے کی بات پر مذاق بھی بڑی غلطی ہے، ایرانی آرمی چیف

ایرانی آرمی چیف میجر جنرل امیر حاتمی نے امریکی صدر ڈونلڈ ٹرمپ کے آبنائے ہرمز کو امریکی علاقہ قرار دینے کے بیان پر سخت ردعمل کا اظہار کرتے ہوئے کہا ہے کہ ایسی باتوں پر مذاق کرنا بھی ایک بڑی غلطی ہے۔ ایرانی میڈیا کے مطابق انہوں نے واضح کیا کہ ایران اپنے دفاع کے لیے مکمل طور پر تیار ہے اور کسی بھی جارحیت کا منہ توڑ جواب دیا جائے گا۔ میجر جنرل امیر حاتمی کا کہنا تھا کہ امریکی افواج کو خطے سے عملاً نکال دیا گیا ہے اور اب انہیں خلیج فارس، بحیرہ عمان یا آبنائے ہرمز میں داخلے کی اجازت نہیں دی جائے گی۔ انہوں نے مزید زور دیا کہ خطے میں امریکی ملٹری بیسز کو دوبارہ ان کی سابقہ پوزیشن پر واپس آنے کی ہرگز اجازت نہیں ہوگی، کیونکہ ایران کسی بھی ایسی کوشش کو سختی سے مسترد کرتا ہے۔