کیرولائن لیوٹ نے استعفیٰ صدر ٹرمپ سے دلبرداشتہ ہونے پر دیا: ایرانی سفارتخانہ

جنوبی افریقا میں قائم ایرانی سفارت خانے نے وائٹ ہاؤس کی سابق پریس سیکرٹری کیرولائن لیوٹ کے استعفے پر ردعمل دیتے ہوئے دعویٰ کیا ہے کہ انہوں نے خاندانی مصروفیات کی بنا پر نہیں بلکہ صدر ڈونلڈ ٹرمپ کے رویے سے دلبرداشتہ ہو کر عہدہ چھوڑا ہے۔ ایکس (ٹوئٹر) پر جاری بیان میں سفارت خانے نے ایک تصویر شیئر کرتے ہوئے لکھا کہ جب باس اپنے اہلکاروں کو خطرے میں ڈال کر خود کیٹرنگ ٹرک کے ذریعے فرار ہو جائے تو رفاقت کی تمام امیدیں دم توڑ جاتی ہیں۔

دوسری جانب وائٹ ہاؤس نے ایرانی دعوؤں کو سراسر بے بنیاد اور گمراہ کن قرار دیا ہے۔ وائٹ ہاؤس کی جانب سے وضاحت کی گئی ہے کہ کیرولائن لیوٹ ترکیہ کے دورے میں امریکی وفد کے ساتھ شامل ہی نہیں تھیں۔ واضح رہے کہ 8 جولائی کو انقرہ سے روانگی کے وقت ایرانی خطرات کے پیشِ نظر ڈونلڈ ٹرمپ کو سیکیورٹی وجوہات پر کیٹرنگ ٹرک کی مدد سے دوسرے فوجی طیارے (C-32A) میں منتقل کیا گیا تھا، جسے اپوزیشن اور ایرانی میڈیا کی جانب سے تنقید کا نشانہ بنایا جا رہا ہے۔