ملک کا اتحاد سب سے اہم، یہ ٹوٹ گیا تو طاقت بھی بکھر جائیگی: ایرانی صدر

اسلامی جمہوریہ ایران کے صدر مسعود پزشکیان نے ملک کی موجودہ سیاسی، معاشی اور دفاعی صورتحال پر انتہائی اہم اور کھل کر گفتگو کرتے ہوئے کہا ہے کہ اس وقت ایران کے لیے قومی اتحاد سب سے اہم ترین ضرورت ہے۔ انہوں نے خبردار کیا کہ اگر داخلی اتحاد اور ہم آہنگی ٹوٹ گئی تو ملک کی دفاعی و سیاسی طاقت بھی بکھر کر رہ جائے گی۔

ایرانی صدر نے ملک کو درپیش شدید معاشی چیلنجز، معاشی پابندیوں اور بنیادی بنیادی ڈھانچے کو پہنچنے والے نقصان کا اعتراف کرتے ہوئے کہا کہ دشمن کے حالیہ اقدامات اور حملوں کی وجہ سے معیشت شدید متاثر ہوئی ہے۔

صدر مسعود پزشکیان  نے کہا کہ پہلے ہم تیل فروخت کر سکتے تھے لیکن اب اقتصادی پابندیوں کے باعث تیل فروخت کرنا ممکن نہیں رہا، جس سے قومی آمدنی میں نمایاں کمی آئی ہے۔ درآمدی اشیاء طویل اور متبادل راستوں سے لانے کے باعث ملک میں مہنگائی کی شرح میں اضافہ ہوا ہے۔ دشمن نے کارروائی کرتے ہوئے ہماری کچھ اہم تیل ریفائنریز کو نشانہ بنا کر تباہ کر دیا ہے، لیکن اس تمام تر صورتحال کے باوجود ہمارے لیے ملکی معیشت کا چلتے رہنا بے حد ضروری ہے۔ انہوں نے کہا کہ  میں کبھی بھی، کسی بھی حالت میں رہبرِ اعلیٰ (آیت اللہ خامنہ ای) کی قیادت کے خلاف کھڑا نہیں ہوں گا اور تمام فیصلے ملکی مفاد میں ان کی رہنمائی کے مطابق ہوں گے۔ مسعود پزشکیان نے معاشی دباؤ کے باوجود ایرانی عوام اور تمام سیاسی دھڑوں پر زور دیا کہ وہ موجودہ نازک موڑ پر باہمی اختلافات بھلا کر سیسہ پلائی ہوئی دیوار بن جائیں۔