نیتن یاہو نے برطانیہ کو ’اسلامی جمہوریہ‘ قرار دے دیا

اسرائیلی وزیراعظم بنیامین نیتن یاہو نے برطانیہ پر سخت طنز کرتے ہوئے اسے ’اسلامی جمہوریہ برطانیہ‘ قرار دے دیا ہے۔ آرمی ریڈیو کے پوڈ کاسٹ انٹرویو میں 1967 کی چھ روزہ عرب اسرائیل جنگ کا حوالہ دیتے ہوئے انہوں نے کہا کہ سابق برطانوی وزیراعظم ونسٹن چرچل کے بیٹے اور پوتے نے بطور صحافی اسرائیل آکر جنگ کی مثبت کوریج کی تھی، جبکہ آج کے برطانیہ میں ایسی کوریج ملنا ناممکن ہے۔ جب ان سے سوال کیا گیا کہ کیا پورا یورپ اس راہ پر گامزن ہے تو انہوں نے اس کی تائید کی۔ نیتن یاہو نے ایک جملے کا حوالہ دیتے ہوئے مزید کہا کہ ایٹمی ہتھیار رکھنے والی پہلی ’اسلامی جمہوریہ‘ برطانیہ ہوگی، لیکن اسرائیل اس بات کو یقینی بنا رہا ہے کہ ایران ایسی دوسری ریاست نہ بن سکے۔