محسن نقوی اور ناروے کے وزیر خارجہ کی ملاقات ، غیر قانونی امیگریشن روکنے کیلئے تعاون پر اتفاق

وفاقی وزیر داخلہ محسن نقوی سے ناروے کے وزیر خارجہ ایسپن بارتھ ائیڈے (Espen Barth Eide) نے اہم ملاقات کی، جس میں دہشت گردی، غیر قانونی امیگریشن کا سدباب، پولیس ٹریننگ اور باہمی قانونی معاونت سمیت مختلف شعبوں میں دوطرفہ تعاون بڑھانے پر مکمل اتفاق کیا گیا۔ ملاقات کے دوران خطے کی امن و امان کی صورتِ حال بالخصوص افغانستان کے حالات اور وہاں موجود کالعدم تنظیموں کی سرگرمیوں پر بھی تفصیلی گفتگو ہوئی۔ نارویجین وزیر خارجہ نے امریکا اور ایران کے درمیان کشیدگی میں کمی لانے کے لیے پاکستان کے سفارتی اور تعمیری کردار کو سراہا۔

ملاقات میں وزیر داخلہ محسن نقوی نے بتایا کہ پاکستان کے موثر اور بروقت اقدامات کے باعث یورپ کی طرف ہونے والی غیر قانونی امیگریشن میں 47 فیصد کی نمایاں کمی آئی ہے۔ انہوں نے کہا کہ پاکستان نے اس حوالے سے زیرو ٹالرنس پالیسی اپنائی ہے جسے یورپی یونین نے بھی سراہا ہے، تاہم غیر قانونی امیگریشن روکنے کے لیے قانونی راستوں کو فروغ دینا ضروری ہے۔ افغان صورتِ حال پر بات کرتے ہوئے محسن نقوی کا کہنا تھا کہ افغانستان کی سرزمین مسلسل پاکستان کے خلاف دہشت گردی میں استعمال ہو رہی ہے اور پاکستان دنیا اور دہشت گردی کے درمیان ایک مضبوط دیوار بن کر کھڑا ہے۔ نارویجین وزیر خارجہ نے ناروے کی ترقی، سیاست اور صحت کے شعبوں میں وہاں مقیم پاکستانی کمیونٹی کے متحرک کردار کی تعریف کیے۔ ملاقات میں وزیر مملکت طلال چوہدری اور سیکرٹری داخلہ سمیت دیگر اعلیٰ حکام بھی موجود تھے۔