سپریم کورٹ میں یومِ آزادی کی تقریب، چیف جسٹس یحییٰ آفریدی نے قومی پرچم لہرایا

سپریم کورٹ آف پاکستان میں یومِ آزادی کے موقع پر ایک پروقار اور شاندار تقریب کا انعقاد کیا گیا، جہاں چیف جسٹس آف پاکستان جسٹس یحییٰ آفریدی نے قومی پرچم لہرایا۔ پرچم کشائی کے بعد چیف جسٹس نے سپریم کورٹ کے ملازمین کے بچوں سے خصوصی ملاقات کی، ان کے ساتھ یومِ آزادی کی خوشیاں بانٹیں اور بچوں میں تحائف بھی تقسیم کیے۔

تقریب سے اپنے اہم خطاب میں چیف جسٹس یحییٰ آفریدی نے کہا کہ آزادی صرف جشن کا نام نہیں بلکہ یہ آئینی اقدار کی پاسداری اور شہریوں کے بنیادی حقوق کے تحفظ کی بھاری ذمہ داری بھی ساتھ لاتی ہے۔ انہوں نے کہا کہ عدلیہ کا فرض ہے کہ وہ اپنی آزادی، غیر جانبداری اور دیانت داری کو ہر قیمت پر برقرار رکھے اور تمام شہریوں کے لیے انصاف تک مساوی رسائی کو یقینی بنائے۔ چیف جسٹس نے اس بات پر زور دیا کہ بالخصوص معاشرے کے کمزور اور محروم طبقات کے لیے انصاف کا قابلِ رسائی، بروقت اور بامعنی ہونا بے حد ضروری ہے۔ انہوں نے مزید کہا کہ قانون کی حکمرانی اور اداروں پر عوامی اعتماد کو مضبوط بنانے کے لیے شفافیت اور ذمہ دارانہ طرزِ حکمرانی ضروری ہے، اور ہم سب کو اتحاد، ایمان اور نظم و ضبط کے سنہری اصولوں پر کاربند رہتے ہوئے ایک پُرامن، منصفانہ اور خوشحال پاکستان کی تعمیر کے لیے اپنا کردار ادا کرنا ہوگا۔