بھارت نے مقبوضہ وادی میں تمام اختیارات ایک لیفٹیننٹ گورنر کو دیئے ہوئے ہیں: چیف جسٹس آزاد کشمیر

آزاد جموں و کشمیر بھر میں پاکستان کا 79واں یومِ آزادی روایتی ملی جوش و جذبے اور شایانِ شان طریقے سے منایا گیا۔ دارالحکومت مظفرآباد میں مرکزی تقریب ہائی کورٹ گراؤنڈ میں منعقد ہوئی جہاں صدر آزاد کشمیر چوہدری لطیف اکبر اور وزیراعظم فیصل راٹھور نے مشترکہ طور پر قومی پرچم لہرایا۔ اسی سلسلے میں سپریم کورٹ آزاد کشمیر کے سبزہ زار میں بھی ایک پروقار تقریب کا انعقاد کیا گیا جہاں چیف جسٹس سپریم کورٹ آزاد کشمیر جسٹس راجہ سعید اکرم نے قومی پرچم لہرایا۔ اس موقع پر ہائی کورٹ و سپریم کورٹ کے جج صاحبان، چیف جسٹس ہائی کورٹ جسٹس لیاقت شاہین، سینئر وکلا اور اسکول کے بچوں نے بڑی تعداد میں شرکت کی۔ پرچم کشائی کے بعد پولیس کے چاق و چوبند دستے نے سلامی پیش کی، بچوں نے ملی نغمے گائے اور جشن کی مناسبت سے کیک بھی کاٹا گیا۔

تقریب سے خطاب کرتے ہوئے چیف جسٹس سپریم کورٹ آزاد کشمیر جسٹس راجہ سعید اکرم نے کہا کہ مقبوضہ جموں و کشمیر میں بھارت نے تمام سویلین و سیاسی اختیارات ایک لیفٹیننٹ گورنر کے پاس رکھے ہیں، اس کے برعکس پاکستان نے آزاد کشمیر کے عوام کو سپریم کورٹ، ہائی کورٹ اور قانون ساز اسمبلی جیسے مضبوط جمہوری اور آئینی ادارے دیے ہیں۔ انہوں نے کہا کہ آزاد کشمیر میں عوام اپنے ووٹ سے حکومت، وزیراعظم اور صدر کا انتخاب کرتے ہیں، اور ہمیں حاصل یہ تمام تر آزادی پاکستان ہی کی مرہونِ منت ہے۔ جسٹس راجہ سعید اکرم نے مزید کہا کہ پاکستان ایک مضبوط ایٹمی طاقت ہے اور پاک فوج نے ملک کو دنیا کی بہترین دفاعی قوت بنایا ہے۔ تقریب کے اختتام پر پاکستان کی سلامتی، استحکام اور خوشحالی کے لیے خصوصی دعائیں کی گئیں۔