ایران کی یوم آزادی پر پاکستانیوں کو دلی مبارکباد، تعلقات میں نئے دور کے آغاز کا اعادہ

پاکستان میں متعین اسلامی جمہوریہ ایران کے سفیر رضا امیری مقدم نے پاکستان کے 79ویں یومِ آزادی کے پرمسرت موقع پر حکومتِ پاکستان اور پاکستانی عوام کو دلی مبارکباد پیش کرتے ہوئے دونوں برادر ممالک کے درمیان تعلقات کی استواری اور ہمہ جہت تعاون کو فروغ دینے کے عزم کا اعادہ کیا ہے۔ یومِ آزادی کی مناسبت سے جاری کردہ اپنے ایک خصوصی پیغام میں ایرانی سفیر نے کہا کہ وہ اپنی، ایرانی حکومت اور عوام کی جانب سے اپنے دوست، ہمسائے اور برادر ملک پاکستان کی محترم حکومت اور غیور عوام کو مبارکباد پیش کرتے ہیں۔

سفیر رضا امیری مقدم نے پاکستانی قوم کی غیر معمولی لچک، اتحاد اور شاندار کامیابیوں کو زبردست خراجِ تحسین پیش کرتے ہوئے کہا کہ دونوں ممالک کے درمیان دوستی، باہمی احترام اور تعاون کے تعلقات انتہائی قدر کے حامل ہیں۔ انہوں نے اس عزم کا اظہار کیا کہ دونوں ممالک کی اعلیٰ قیادت کے پختہ ارادے اور مشترکہ کوششوں کے باعث پاک ایران تعلقات میں ایک نئے دور کا آغاز ہو چکا ہے، جو خطے میں امن، خوشحالی اور متعدد شعبوں میں تعاون کے نئے افق روشن کرے گا۔ ایرانی سفیر نے پاکستان کی مسلسل ترقی، امن، استحکام اور خوشحالی کے لیے نیک تمناؤں کا اظہار کرتے ہوئے امید ظاہر کی کہ دونوں عظیم قوموں کے درمیان دیرپا دوستی اور دوطرفہ روابط روز بروز مزید مضبوط ہوں گے۔